嘩，有大發現！央視新聞聯播噚日播出一帶一路新聞片，示意圖竟然多咗枝箭，由海南島射去澳洲！內地媒體稱為海上絲綢之路南線，係中央首次公諸於世。咁搞法，即係話一帶一路範圍再擴大，變咗一帶兩路，包埋印尼、澳洲、紐西蘭，噚日A股鐵路股、基建股、港口股又再炒過。
阿爺從來冇正式公佈過一帶一路示意圖。顧名思義，一般人都會以為，絲綢之路經濟帶就包中亞、東歐地區；海上絲綢之路就包東南亞、中東，但今日央視不覺意洩露咗國家機密，外界先知，原來中央有咁大諗頭，想食埋南太平洋。
而家全世界都喺度炒緊一帶一路，但恐怕好少人知一帶一路究竟乜東東。大家都係炒概念，總之有張世界地圖任畫任舞，越吹越大，股價就越升。
黃尹華