近日成為先施錶行（444）聯席主席嘅胡定旭，噚日出席香港總商會活動，大談對中港發展嘅睇法，暗撐恒地（012）主席李兆基與新地（016）提出嘅邊境購物城大計，仲話「購物城起1,000萬呎唔夠嘅話，可以起到2,000萬呎」㖭呀。
恒地與新地早前話，有意以1蚊借出落馬洲新田一幅42萬平方呢嘅地皮興建邊境購物城。胡定旭噚日被問到粵港可以點樣合作，佢即刻舉例指，以前香港人上深圳消費，一到羅湖都有個羅湖城畀港人喺入面消費，調番轉「香港邊境咁多地方，點解唔可以起番個邊境購物城畀啲內地旅客嚟買嘢呢？」
佢認為，如有購物城，內地旅客就可以喺入面盡情買奶粉、紙尿片或者藥材。此舉仲可以減少本港公共交通壓力，香港作為東道主，巿民應該多啲包容，做多啲好事咁話。