噚日立法會討論亞視「身後事」，好多議員都鬧爆政府獨斷獨行，逼港台硬食兩條模擬頻譜，一直播到2020年模擬廣播壽終正寢。人民力量「慢必」陳志全批評，商經局喺處理亞視危機一役，就算唔係失職都係輕敵，又質疑今年1月開會時問過常秘何淑兒，何都唔敢肯定港台係咪肯定有能力接手，做乜𠵱家就一錘定音塞畀港台呢。
點知常秘即刻答正因當時慢必個意念夠創新，真係同港台傾過，認為港台應係最有把握接手。慢必無端端變咗一台獨大嘅「幫兇」，其他議員都笑笑口話「哦，原來係你」，慢必就急急澄清當時叫港台「做住先」，唔係「做到尾」囉。