將於下月升做九龍倉（004）第一副主席嘅周安橋，舊年被減薪三成，成為減薪幅度最大嘅董事，不過大家唔使戥佢陰功豬，事關佢減薪後，總年薪都仲有1,768萬元。
根據九倉最新年報，除咗周安橋，九倉大老闆吳光正與副主席吳天海舊年都要減薪，主要係花紅大減。吳光正嘅花紅削近三成，令總年薪減少17%，袋3,259萬元。將於下月接替吳光正做九倉主席嘅吳天海，舊年就袋2,145萬元，減薪18%。佢哋減薪其實都合理，九倉舊年核心利潤減少7%喎。
不過又咁講，吳光正對老臣子都算唔錯，喺九倉做咗接近30年嘅前執董吳梓源舊年底退休，佢舊年就有2,000萬元花紅，齋計花紅已經比對上一年多一倍，全年袋走接近2,500萬元。