相信大家搭飛機，總會試過有小朋友喺架機度狂喊，令人完全無法休息，束手無策，人民力量袁彌明前日喺facebook點起火頭，暗示自己用咗咁貴嘅價錢買咗一張商務艙機票，本想安靜休息一下，點知有個小朋友搞到全個cabin都「無覺好憤（瞓）」，提出問題討論，例如小朋友係咪有權坐商務？點知畀網民鬧到飛起。
話說近日去咗日本嘅袁彌明大吐苦水，話如果程機度有個約8歲嘅小朋友大聲叫喊，搞到全機艙冇人有覺好瞓，因而提出幾大問題，包括：「我有無right去要求一程安靜嘅旅程？個小朋友有冇right去坐business？航空公司有無責任保障cabin舒適？如果airline限制某種人唔可以買某個class（class本身就是price discrimination），咁係咪discrimination？」
同類問題現CX Secrets
與此同時，咁啱又有人喺空姐空少聚集地CX Secrets facebook貼咗類似意見，仲問喎： 「為甚麼國泰要賣商務票給小孩，令其他客人受罪？那我下次坐經濟艙不也是一樣嗎？」有人喺fb留言，話相信提出呢個問題嘅，就係袁彌明喎。八方噚日搵過袁彌明，想知佢係咪氣憤難平，所以周圍貼文想多啲人知？但截稿前未有回覆。
而佢呢番話引起包括空姐空少嘅網民熱論，唔少人都唔幫最美麗主席，覺得唔應該貿貿然唔畀小朋友上機，反叫佢如果咁有錢，不如坐私人飛機啦；但都有人身同感受話，如果坐商務而預着小朋友係咁嘈，真係好慘嘅。
資深空姐：可安排調位
八方噚日問過一位資深國泰空姐，佢話如果遇到呢啲情況，最常處理嘅方法有幾個，例如送雪糕、朱古力、餅仔、貼紙、畫簿𠱁小朋友，希望平復小朋友情緒，或者同小朋友嘅父母傾偈，順勢叫佢哋請小朋友安靜啲。如果小朋友同大人都控制唔到，可以安排投訴嘅客人調位，或者畀個耳塞。不過袁彌明提出嘅「小朋友有冇right去坐business」，佢話答案係「有」，而且航空公司冇話邊個歲數唔買得邊類座位，所以袁講嘅「限制某種人唔可以買某個class」，就更加冇呢回事。
李八方
mailto:[email protected]
