唔少香港市民噚日歡天喜地，尤其係住喺北區、屯門、元朗等居民，事關中央終於宣佈將「一簽多行」政策改為「一周一行」，如無意外都可以遏止到水貨客活動，相關地區居民從此喺街上走動空間闊落啲，唔使逼到被篋神轆腳，點會唔笑番晒吖！之但係一河之隔嘅內地居民，據聞卻怨氣沖天，仲建議中央限制港人到內地先公平喎。
查實喺星期六晚有消息傳出，內地當局有意收緊「一簽多行」消息後，有位駐喺深圳做嘢、已經好少返港嘅老友即時Whatsapp問花生友：到底香港人𠵱家係咪真係好憎內地人？點解佢咁問？原來佢話當地嘅電視台，不停播放香港反蝗、反自由行、反水貨客嘅新聞，身在國內，見到香港咁嘅情況都驚驚，引述有當地嘅居民因此對港人好有仇恨，覺得香港人好巴閉咩？
花生友都解釋，其實呢種反內地人情況，都唔係普遍港人都有嘅，但對方似乎呢個message，佢喺當地感受唔到咯。而至噚日中央公佈「一周一行」消息後，花生友問呢位老友，佢當地啲friend點睇？佢回覆梗係唔like啦，引述有人話唔公平，點解內地人嚟港要簽證，香港人返內地又無限通行？覺得中央應該一視同仁喎。
咦，呢番「報仇」論調同噚日內地網民意見好似，花生友嘅老友笑笑口話呢啲咪叫做「同仇敵愾」。難怪有政界諸事友指，調整「一簽多行」係就係為梁振英攞到分，之但係內地政府同人民因而產生嘅怨氣，唔排除某一日大爆發，仲可能對梁振英連任不利，「點知內地省市會唔會喺某啲政策玩香港？」
花生友