繼續獲政府「泵水」嘅香港足球總會，6月選出新任董事局成員，現任主席梁孔德噚晚董事會後除咗承認有意留任，亦冇否認現任會長霍震霆次子啟山入局嘅江湖傳聞。現任小型足球總會會長嘅霍啟山，兩年幾前曾經同邱浩波競逐因為白韞六獲任做廉政專員而騰出嘅足總董事空缺，但以23票對26票落敗。今次呢位霍家二公子捲土重來，聽講已經協調晒一定做到董事，至於將來有冇機會繼阿爺霍英東同老竇霍震霆後，「世襲」足總會長呢個位，大家就拭目以待。