香港每日有3,000人等緊合適嘅器官接受移植，不過中國人對於捐贈器官都幾忌諱，𠵱家只得2%市民登記死後捐贈器官咋。
致力推動生命教育及器官捐贈嘅「身前行動」舉辦咗「器官捐贈30秒短片創意大賽」，搵咗名導演杜琪𥧌擔任首席評判。噚日嘅開幕禮上，食物及衞生局局長高永文都有畀面撐場，佢話香港首宗腎臟器官移植係1970年由梁智鴻醫生操刀，之後技術一直進步，而肝臟移植嘅技術更加係領先世界，好多新嘅方法都係香港首創，反而面對最大問題係捐贈者不足，認為拍短片喺生前明志，係別開生面嘅推廣方法。同場有「金刀梁」之稱嘅梁智鴻上台發言時就笑言，平時局長講嘢，佢都唔敢糾正，但今次冇辦法唔咁做，事關民望高原來記錯日期，因此一定要更正番，強調當年佢參與本港首宗腎臟移植手術係1969年先啱。