G.E.M.(鄧紫棋)早前因為參加《我是歌手2》喺內地爆紅，不過最近上《我是歌手巔峰會》，基於製作單位要求臨時換歌，其他歌手都被說服換歌，惟阿G.E.M.一方堅持「公司唔想敷衍舞台、敷衍歌迷，經過認真考慮先決定退賽」，即被網民圍插「耍大牌」，飽受壓力嘅G.E.M.早前出席內地代言活動，G.E.M.坦言曾想過退出娛樂圈。
近日G.E.M.再次接受內地媒體訪問談及如何看待外界對佢嘅質疑，講起被《我是歌手》是非纏身，G.E.M.冇直接講邊個啱、邊個錯，G.E.M.稱自己現時正係訓練應對成長所需要「突如其來」嘅事情，訓練自己唔使害怕。問及如果有機會再選擇一次，係唔係仲會參加《我是歌手》，G.E.M.答：「生命刺激的地方就是不能重來。」
據知，杏兒目前都係北上賺人仔，G.E.M.連日又被網民「翻舊帳」重提佢當年鬧胡杏兒一事，G.E.M.於內地媒體訪問中聲稱：「那個時候我還是初中生，因為她跟鍾嘉欣演的一個劇裡面是對頭，我喜歡鍾嘉欣的角色，所以就罵她啦!所以有時候想自己在網上被罵，大概就是報應吧。」 G.E.M.當時喺網上公開指「肥杏」胡杏兒係「最賤最樣衰最唔識做戲最乞人憎嘅演員」，如果06年無綫頒獎禮畀咗個女主角獎胡杏兒， G.E.M.一時氣言會即刻打爛部電視。