【第34屆香港電影金像獎之新演員篇】下周日（19日）舉行的香港電影金像獎頒獎禮，除了傳統四大獎項外，今年最引人入勝必定是全女將爭最佳新演員獎，當中王菀之獨佔三個提名，來自內地的蔡潔及出身自電視的張雪芹似乎只是陪襯。不過一日未頒獎都唔可以認輸，或者套用近日熱爆廣告語：「明知會輸，但我哋都一定要贏！」
撰文：黃曉妍、何永寧
蔡潔床戰彈出
中華小姐出身的蔡潔憑彭浩翔執導的《香港仔》入圍最佳新演員，日前她在尖沙嘴受訪時，笑稱當初彭導曾以「有可能金像獎提名」作利誘，想不到真的應驗！蔡潔一直認為獎項離她還遠，如今獲最佳新演員提名，將會是一個有明確目標的方向牌，她說：「攞到提名已經得到大家一個肯定，結果係點唔重要。」
在《香港仔》剝衫與曾志偉上演床戲，再加上彭導的電影大多都獲得獎項，縱使蔡潔將「平常心」掛在口邊，說實話，有沒有增強奪獎信心？她說：「呢啲好難參考，因為我同佢哋唔同，大家不嬲都話彭生好旺女演員，我覺得𠵱家佢都旺緊我，因為《香港仔》令好多人認識我，亦畀我好多機會繼續做演員，其實君如拍《金雞SSS》都有搵我，亦有人採訪我，所以我好感激彭生，佢仲好肯教我一啲有關幕後嘅工作。」
最佳狀態準備就緒
面對王菀之這個勁敵，單是「最佳新演員」已有三部電影《金雞SSS》、《分手100次》及《Delete愛人》獲提名，蔡潔說：「佢贏咗㗎喇應該，可以同佢一齊提，我覺得已經贏咗，我好鍾意佢，佢唱歌有內斂一面，本身個人好溫柔，估唔到佢做笑片會放得咁開，同埋佢好大膽，唔理自己乜嘢形象，好好睇，帶畀我好多歡樂；另一位張雪芹演得好好，笑容好sweet，其實我對自己好有信心，但對獎就平常心，因為獲提名嘅人都係做得好，證明自己都唔錯。」為了金像獎頒獎禮，她特別找來營養師度身設計一個餐單及做運動，務求當晚以最佳狀態示人。
場地：The AIR（The ONE）
髮型：Vince Pang of ILcolpo Platinum
化妝：Cyrus Lee
服裝：D&K Design
最佳新演員提名名單
王菀之《Delete愛人》
王菀之《分手100次》
王菀之《金雞SSS》
蔡潔《香港仔》
張雪芹《點對點》
資料來源：香港電影金像獎協會