恒指9日RSI升到去94.8，高得非常誇張，一定叫得做「超超買」，同內地A股亢奮時期RSI高位有得揮，如果今日再夾高幾百點甚至成千點，即市9 RSI夾到上去96甚至更高，晋佳會選擇大手減持，實行袋住先再吼位撈貨。即使估錯，夾到上30000都相信會掟番落28000，先至重新上路，吼位上番車應該唔難。
港股A股化已經冇得抵賴，玩法自然冇乜兩樣。參考A股升浪嘅第一次RSI高位，出現喺舊年12月中，當時RSI同樣高到90以上水平，之後隨即出現單日大震倉，一日裏面大部份當炒股跌停板，如果重覆A股玩法，恒指出現一日大跌千幾點你夠驚未？當炒股單日插兩成，呢種調整估計今個星期出現。
雖然晉佳選擇避一避呢棍大調整，但估計調整亦唔易跌破27000，原因係當初升破25000之後，已經成為強大支持，好難畀機會閣下喺26000呢個咁貼近強大支持位去買貨，所以27000已經夠低去吸貨。
另外，港股難得出現亢奮，party一定冇咁快收皮，以1997年、2000年同2007年大牛三經驗，牛三必定會出現RSI頂背馳。而家恒指先出現第一個RSI高位，估計調整後至少仲有一個月喪炒，所以第一個大調整出現後，點都要低位仆番入場，迎接第二浸升浪。
和諧汽車非泛泛之輩
選股方面，和諧汽車（3836）將會係best buy之一，呢隻股幾個月前俾鴻海郭台銘入股，預計會成為電動車生產旗艦，皆因和諧汽車仲傾緊收購從事生產電動車嘅綠野汽車，一旦落實就成為爆升因素。郭台銘講過，要打造平價電動車，價錢50萬台幣有找，和諧汽車可能係重要嘅生產平台，概念贏晒。
和諧汽車目前主要係從事汽車銷售同售後服務，並能夠經營Tesla喺中國首家售後服務嘅企業。換句話說，和諧汽車擁有維修高檔電動車嘅know how，難怪郭台銘願意入股。呢間和諧汽車同時泊到郭台銘同Tesla嘅Elon Musk兩位神級勁人，就知間公司絕非泛泛之輩。
和諧汽車舊年收入升22.4%，純利升34%，表現相當唔錯，每股盈利51分人民幣，即係舊年市盈率13倍，剩係買優質汽車經銷同售後服務業務都抵，電動車單嘢明顯等緊price in，股價剛開車。
今轉博港股調整之後，第一時間撈底，就係買呢啲，以市盈率20倍計價，中線13蚊不是夢。
晉佳
http://www.facebook.com/pages/晉佳/719009541518415
本欄逢周二刊出