又係一場事先張揚的命案，今次受害嘅可能係……一堆芒草。同事小江子，已經被列為傳說中嘅摧花手，皆因佢最鍾意周圍採花（唔好誤會，佢係用相機鏡頭去採花啫），然後報道最近有啲咩花草樹木盛放。每次寫完之後，都會吸引大批市民去賞花，但可能人太多，搞到附近交通擠塞，甚至小部份人冇公德心，摧殘咗啲花。
#多蟻竇 附近有墳場
今次佢就去咗打鼓嶺坪洋，影咗一批相，見到一片草海，佢話應該係芒草，位處一大片廢田，嗰度荒廢咗後，慢慢長出野草，部份都有半個人咁高（圖）。部份人慕名而至，所以近日喺facebook都會見到呢類相。佢話可以由粉嶺港鐵站搭小巴52K，然後喺雲泉仙館落車，過對面小路行上山，就會見到長滿疑似芒草嘅廢田。
小江子原本唔肯畀費清寫㗎，怕又一次不殺伯仁，伯仁為佢而「屎」。但佢諗諗吓覺得今次未必，因為嗰度唔只地方偏遠，而且有好多狗，「啲狗對陌生人好敏感」。嗰度仲好多蟻竇，但芒草咁長，行過都唔會望到，「試過唔小心踩落去，咬到成腳都係」。仲有一樣嘢，佢話嗰度附近都有唔少墳墓㗎。
有冇人會去？費清都想知啲人想影靚相，可以去到幾盡。
費清 ＃要生計，也要生活 ＃毋忘初衷