最近內地股市唔少人關注，中央財經領導小組辦公室主任劉鶴，喺第一季經濟數據公佈前夕，去咗上海搞經濟調研。劉鶴其實係中央經濟政策真正揸fit人，據聞三中全會文件由佢起草，有媒體稱之為國師。
點解內地股民覺得劉鶴去上海咁重要？因為劉鶴如果以中財辦主任身份出巡，好可能係為中央政治局經濟會議做準備。按慣例，政治局經濟會議一年只開兩次，分別喺7月同12月，但舊年就加碼，喺4月開多咗一次，之後中央就開始放水。所以而家唔少內地股民博今年4月有機會再開會，令股市仲有得再升。
內地股民鐘意炒呢啲政治消息，除咗政治局會議外，嚟緊4月中，要開國務院經濟會議，年中又要開全國城市工作會議。而家北水話晒事，恐怕香港股民亦要花多啲時間留意下。
黃尹華