現代足球，最重要係乜人？有人十幾年都堅持係防中，有人話近代係美斯同基斯坦奴朗拿度嘅天下，我從來相信足球場上任何一個位置，都比唔上操球員生死、場邊落柯打嘅領隊。
曼城剛大敗紅魔，延續今年災難嘅下半季後，自成圍插焦點；藍月近季成功之匙耶耶托尼，成為英國當地球評家今戰賽後嘅「研究」焦點，有一派話藍月大敗係佢懶於防守，另一派就話領隊佈陣問題。筆者鍾意寫賽前評論，少於馬後炮，一來挑戰性更大，二來，過份沉醉往績、近績，總覺被牽住鼻子走。曼城上季後上封王，正因落後冇退路，耶耶移前一格，拚出彩虹；一季過後，呢位非洲天王變成代罪羔羊，其實只因藍月氣勢已老、新兵不濟，最大件事係領隊比歷連尼比球員更早心灰。
阿仙奴唔使錢，年頭回收高基連打單防中，竟成今季英超「最進步獎」大熱門，冇幾人估到；剛戰作客般尼，呢位23歲嘅法國人球竟做出11次截擊、兩次攔截同兩次解圍，當選該場最佳球員，喺眾星級隊友環伺下，前者勢頭浪接浪，似現今香港股市嘅狂潮。
如果大約10年前，當時仍效力阿仙奴嘅中堅高路托尼，唔係不斷推介細佬耶耶畀波士雲格都不得要領，或許耶耶喺𠵱家尚攻嘅兵工廠年代，仍然一人頂住成條中場線，唔係高基連，或者近年失敗之作戴亞比或者丹尼遜之流，又或者將年紀唔輕嘅阿迪達改造。英超「不死領隊」雲格嘅眼光，唔會比其他人好，只係佢好似有無窮時間撥亂反正，其他波士冇。
比歷連尼，戰術冇錯，耶耶打攻中有過光輝歲月，比帥居功不少，不過幫到曼城呢類頂級大球會，上季攞雙料冠軍，唔代表一世免炒。錯係負責入貨嗰位（相信冇人敢出嚟孭鑊），今季為藍月買入嘅新兵冇個掂，球隊老化問題喺下半季浮現。試想，耶耶𠵱家身邊嗰位唔係又貴又唔後生嘅兩個「費蘭」，係高基連全力協防；以曼城球員嘅級數，今季有力再現後勁冧莊。可惜比歷連尼喺同市打吡賽前，已洩氣講今季球會前途已掉入「垃圾桶」，一眾高薪兵又點會同一個「快炒」嘅老細賣命？
喺曼市打吡，當兩軍半場後再踏草地時，從鏡頭前看到另一「費蘭」，紅魔費蘭尼「火噴噴」嘅眼神，準備再殺個痛快；耶耶托尼隨之垂頭喪氣，冒雨再踏刑場似的。成也耶耶，敗也耶耶，大佬仲踢緊紅軍，信31歲嘅耶耶，經過歇暑足夠休息後，喺來季新波士領軍嘅藍月，會重現步大力雄，後上攻門嘅威力，助藍月重振雄風。
今周歐聯冇英超隊，欣賞同投注感覺一般，貼士從略。
波神