商務及經濟發展局局長蘇錦樑噚日出席民主黨主席劉慧卿嘅網台節目，未錄影前當然係吹水啦，蘇錦樑話好欣賞卿姐喺立法會嘅表現，八方就問佢，咁有冇俾卿姐以金句「離晒譜」鬧過先？蘇錦樑笑笑回應話：「梗係有啦，好多次啦，呢句簡直係佢嘅『問候語』。」
雖然蘇錦樑貴為局長，但係噚日佢出席節目，只吸引到兩個收費電視台嘅新聞部嚟採訪，卿姐同蘇錦樑講：「你睇吓，你啲免費電視杯葛你。」蘇錦樑仲話呀，當日亞視新聞報道突然「爆料」，話已經將股權賣畀王維基，事件相當戲劇化，搞到佢又要等傳真文件，又要準備文件召開翌日行會，當晚只係瞓咗好少時間咋。