周日上演嘅東、西岸「老九」大戰，主隊溜馬以116:104贏咗有「潮韋」韋斯卜克（Russell Westbrook）攻入個人紀錄54分嘅雷霆，保住入季後賽機會。之前斷腳長唞嘅保羅佐治（Paul George）仲表演咗復出後首次入樽，真係可喜可賀。
PG自上年夏天斷腳唞足八個月，啱啱先復出，所以幾場都只係後備落場十幾分鐘。今場佢打咗14分鐘，攞到唔錯嘅八分同六個籃板，第一節仲表演咗球大力入樽，令全場球迷high爆。
潮韋打甩「T」免停賽
雖然離自己嘅top form仲有一大段差距，但PG復出明顯振奮士氣。令人驚喜地提早復出、仲有機會打季後賽嘅PG賽後話：「對我哋嚟講，𠵱家每場波都係一場季後賽，係一個充滿樂趣嘅時刻；可以喺咁嘅情況下打波，我真係超開心。」
同PG一齊成為今場焦點嘅，當然唔少得一個打五個嘅韋斯卜克啦。潮韋全場起手43次，轟入個人職業新高54分，仲交出九個籃板同八次助攻，就算幫唔到球隊贏波都要讚吓佢隻手夠力。不過，本來佢呢場食咗個技犯，今季儲滿16個T（技犯）要停賽一場，好彩聯盟收回成命，今日就鬥到拓荒者。
溜馬贏波後，戰績已經追平同日輸波嘅網隊，但對賽紀錄就差啲，所以暫時仍然排第九。而周日幫溜馬一把打贏網隊嘅公鹿，就正式成功「上車」，鎖定東岸第六個季後賽資格。
