大記者搭親巴士、地鐵就成為低頭一族，成日睇住部iPhone，唔係上網睇新聞，就係玩WhatsApp，與一眾老友app嚟app去。復活節假期星期一，佢去澳門掃墓一日遊，落船冇耐，佢又係如常咁玩電話，後來覺得眼攰，於是瞌眼瞓，落船後上咗的士，見到有好多短訊噃，收到台灣、日本、曼谷旅行嘅朋友傳來好多相片，於是又玩app一輪。
直到掃墓完畢，在餐廳坐低嘞，佢先至睇到和記3嘅message：你使用漫遊數據超乎平時，請與本公司聯絡。急忙打電話去一問，先知道自己完全冇理會和記3之警示，離開香港海域之後仍然使用數據漫遊，與人無尤，結果呢，去一去澳門，無端端多用千幾蚊「漫遊費」，益晒和記電訊。
大記者講俾我地聽，叫我地注意，以後唔好犯錯，點知反被眾人笑到儍，事關人人都識一上機、一落船就會off咗電話嘅數據漫遊服務，邊度會犯呢啲錯誤㗎。但今日人人熱衷於WhatsApp，如果一時玩到上晒心，乜都唔記得晒，又真係要注意吓嘅。
去到外地，用和電嘅每日數據漫遊計劃138、168係幾方便嘅，左丁山用過好多次。但上次去曼谷，肥仔K為三部iPhone買咗三張泰國SIM咭，在機場買就係300銖一張，用泰國SIM咭換掉iPhone SIM咭之後，三日內就當係當地電話用，可以打電話，上網，WhatsApp，真係抵到爛，乜唔係啫，300銖等於71.6港元，用三日，即係每日24元不到，仲唔抵玩？仲平過買隻WiFi蛋。
因電訊科技進步，人人都用智能電話通訊，無遠弗屆，譬如肥仔K啲同學去咗日本旅行就影張相（日本文字內容）app過嚟，要肥仔K即時繙譯，等佢地知道買嗰件物品，制唔制得過，呢樣事情，即使在十年前，仍然係想像唔到嘅，猶記得2000年之時，靚女公關在一間新科技公司工作，經常傳來新聞稿講及最新「短訊技術」（messaging）及流動通訊，左丁山收到就睇到一嚿雲，不明所以。十五年間，當年講乜講物嘅最新科技，皆已盡成古董，全遭淘汰。香港特區政府要講創新科技，成立乜乜委員會，用意本好，只怕到班專家委員達成共識，認為乜乜科技有前途之時，市場已將嗰啲技術拋在後頭咯。