楊千嬅、陳志雲、C AllStar同導演舒琪等噚日喺中環出席器官捐贈拍片比賽揭幕禮，曾經做過醫護人員、幾年前經已簽咗器官捐贈卡嘅千嬅，喺活動上表示身後只要器官健康，就會捐出幫助有需要嘅人，呢個意願亦一早獲家人支持。千嬅又講起早前同囝囝Torres去迪士尼玩，不停被身邊小朋友稱呼自己做「校長」，起初佢都唔為意，直到有人提佢先知原來係電影效應，佢話：「嚟緊都要有番校長嘅款，我都驚啲小朋友問校長點解紫色頭髮，諗住同佢哋講因為校長放學後要兼職做歌手。」
驚影響囝囝返學
之後千嬅被問起囝囝被登雜誌封面，之前回應時好似有啲𤷪咁，佢：「因為個仔之前一晚發高燒到39度幾，之後同事叫我回應件事，我咪經電話錄音回應，可能見唔到樣先覺得我語氣好嬲。我慣咗，不過唔好放到小朋友個樣咁大，驚第時返學有影響。」
而同場嘅「身前行動」創會主席廖安麗上台致辭時激動落淚，佢感激各方義務出力促成今次活動，希望藉住網上宣傳效力，利用參賽短片引起大眾關注器官捐贈。
撰文：馮仁昭