A股狂牛蔓延到港股，就算財爺點否認都好，有炒開嘅老散都會發現港股已經A股化。呢期升得最勁嘅股份，有唔少係喺內地知名度高嘅股份，好似國美（493）、金山軟件（3888）、酷派（2369），甚至係基本因素唔得，但內地非常入屋嘅百麗（1880）。港股自復活節長假後，港滙持續強勢，成交日日過2,000億元，北水南流係鐵一般事實。
阿爺第一步落實真滬港通，第二步取消一人一戶限制，之後可預期嘅係深港通，然後就係傳聞將港股通額度升至400億元人民幣。好肯定係阿爺就係想內地錢湧落香港。而家連深港通都未真係推出，所以未需要擔心政策轉向住，個市仲有得玩。
金地商置（535）母企係金地集團，內地知名度極高！3月合約銷售總額，按月勁升230%至6.05億元人民幣。業績靚仔，近日已成為唔少內地散戶關注股份，喺雪球網人氣急升。
金地商置前身係星獅地產，目前係金地集團作為商業地產主要投資平台。集團現時正轉型為收租股。旗下位於深圳南山區的深圳威新科技園第一、二期出租率達100%，租戶有華為、阿里巴巴及英特爾，同時持有北京中關村搜狐網路大廈60%權益，可以話係科網概念地產股。第二大股東OUE Lippo，上年12月以每股0.52元入股，噚日先去番呢個水平，相信升浪仲有耐都未完。
Fifi
http://www.facebook.com/lovefrystock
本欄逢周二、四刊出