立法會會計界議員梁繼昌（Kenneth）又無功而還了！話說噚日立法會財經事務委員會舉行會議，其中一個議程係講金融發展局嘅最新情況，Kenneth臨時動議，建議金發局改名為「金融發展委員會」，認為咁樣先至可以「精準體現金發局現有功能」，可惜其他議員唔buy佢呢個講法，最終表決，只得Kenneth贊成，7位議員反對，金發局唔使改名了。
其實Kenneth係第三年提出類似動議，全部被否決。噚日議員王國興仲力撐金發局主席查史美倫，指「名唔重要，最緊要做到嘢」喎，所以佢反對改名。金融服務界議員張華峰亦都反對。
查太就多次提到，佢哋只屬於諮詢機構，目前冇打算轉為法定機構，即使係轉，都唔會改變佢哋現有嘅運作模式。