現年35歲的李雨陽（Eddie）曾經跟「百果園E神」陳靜（DaDa）拍拖，但DaDa事業越來越好，近年進軍大銀幕拍電影；反觀Eddie三年前簽約港視做藝人，如今港視不獲發牌，Eddie的合約至今個月底便屆滿，快將成為失業大軍。
「媽咪想抱孫」
Eddie與DaDa感情無疾而終，不過他都很勤力，一直有另覓發展出路，除與朋友合資銷售原味雞，最近感情亦有着落。昨日有讀者透過本報「爆相爆片」分享Eddie與家人聚餐相片，除有Eddie媽媽、兩位弟弟及弟婦外，還有一位頭髮長長、樣子清秀的女仔，見Eddie好肉緊攬住對方手臂，肉緊錫了一啖，看來Eddie好鍾意對方。據悉是Eddie媽媽在facebook留言：「開心、開心，又係開心家族聚餐，約都約唔到咁齊人。」
Eddie昨日在電話中不敢直認新戀情，只說：「有咩？邊有呀，觀察吓先，又唔係識咗好耐。攬住錫？咁啱聞到香味啫。」帶女友見家長？他說：「唔係呀，咁啱啫。最衰細佬結婚兩年都未生小朋友，媽咪又想抱孫，所以成日催我結婚。」
Eddie對未來電視行業前景感暗淡，所以不敢談婚論嫁，並說：「好多嘢都好得意，無綫義助（亞視）資源共享，我哋（港視）捧出嚟個男神又唔係自己公司。𠵱家仲好似得番一間電視台，nowTV方向又唔知點？」故Eddie已打算返內地發展：「同屋企人傾緊，想賣咗香港間屋去廣州置業，因為有內地經理人公司搵我，條件都唔錯，包我好多登台同電影，即使同酬，但賺人仔都貴過港紙。」
採訪：嵐山
