近日不時有雨，呢日場地或因此較濕滑，跑到第六場四班千四米，入正直路冇耐，「駿穎」移出中叠望空衝刺之際突然斷腳，並將鞍上人郭能拋咗落地，尾隨之「精益旅程」煞唔切掣，亦人仰馬翻，後駒騎師潘頓停賽前墮馬，跟手另一騎師鄭雨滇雖然已經將初出馬「皇廷珈加」收慢，但仍受牽連，鄭雨滇同樣跌咗落地。
一連串連環跌馬鏡頭情勢凶險，幸而吉人自有天相，跌得最甘之郭能，落地後碌咗幾吓暈暈哋，幸而仍清醒，但仍要被抬上救護車送去檢查，至於潘頓同鄭雨滇，都可以起身行無礙。
經駐場醫生檢驗後，除咗潘頓可以繼續餘下賽事之外，鄭雨滇同郭能都要退下火線，兩人座騎悉數易配。至於「駿穎」因斷腳之故，即場被人道毀滅，五歲澳洲自購馬來港三季，只得一win便告戰死沙場。
http://racing.hkjc.com/racing/video/play.asp?type=replay-full&date=20150412&no=06&lang=chi