港股上周連日爆升，唔少人聲稱身家暴漲，多咗錢可以湧去買樓，搞到兩個新盤嘅售樓處噚日人頭湧湧。其中，會德豐（020）旗下油塘新盤仲吸引到藝人高海寧包到冚咁，去到設於尖沙嘴嘅售樓處參觀示範單位。
高海寧下午兩點現身售樓處，即使佢着住長袖衫、長褲，戴埋口罩，都輕易被人認出。地產代理帶佢睇示範單位，又拉佢行埋一邊再作介紹。
聽聞佢即場入票認購，逗留一粒鐘走人，離開時少少晦氣咁話「唔接受訪問」。發展商暫時推出150伙，最平500萬元，最貴過千萬元，唔知高小姐心儀邊款單位呢？
其實港人睇樓閒過立秋，藝人睇樓都唔使扮蒙面超人啫。高小姐都唔算誇張，早排楊怡戴口罩兼cap帽先誇！