港協暨奧委會會長霍震霆唔止對體育活動有興趣，舞台劇都啱喎。華華上星期五晚喺尖沙嘴文化中心睇舞台劇《小城之春》，就發現霍震霆單拖到場，咁啱房協前主席鍾瑞明亦在場，兩人喺開場之前企埋一邊傾偈，之後分頭入場。
1948年公映嘅《小城之春》乃已故中國電影導演費穆嘅經典名作，曾獲香港電影金像獎評為「中國電影一百年最佳華語電影一百部」第一名。
內地導演李六乙將佢製作成舞台劇，由北京人民藝術劇院與中國國家話劇院國家級演員演出，費穆女兒、著名聲樂家費明儀出任舞台劇藝術顧問，呢晚亦盛裝出席。霍震霆跟內地關係密切，可能想欣賞呢個由內地單位製作嘅經典故事，費明儀見到佢亦即刻拉住佢影相留念。