金管局總裁陳德霖有個花名叫做「攞命陳」，主要係佢英文名Norman嘅諧音，唔係話佢做過乜嘢好攞命嘅事，跟佢共事過嘅人都話，陳德霖冇想像中咁攞命，起碼好少半夜三更收到佢電郵或者追魂call。
華華思疑陳德霖內心都覺得幾寃枉，佢早喺2006年做緊智經研究中心主席時，已經主動開口叫大家唔好叫佢「攞命陳」，建議改口叫佢做「浪漫陳」，不過冇乜人理佢。三年前，佢太太、即係積金局行政總監陳唐芷青又借機會幫口，話陳德霖其實好浪漫，叫「浪漫陳」至啱。
可惜，「攞命陳」呢個花名實在太易上口，亦深入民心，一時三刻都好難話改就改，加上浪漫呢家嘢，只得陳太先至感受到，除非陳德霖可以跟大家分享一件浪漫至極嘅事，咁或者大家都可以改口嘅，睇《星星》肯定唔算囉。