日本女星深田恭子早排同龜梨和也合演嘅劇集《Second Love》，就算佢哋有好搏嘅床戲，收視都麻麻，話題性亦比預期低，唯一被談論嘅話題係恭子個樣變到好膠！雖然被批評，但恭子仲有廣告拍，佢日前就出席咗代言健康飲品記招，不過，被談論嘅依然係佢個樣又起變化！有網民睇到啲記招相後覺得恭子個嘴好怪，而佢似乎眼皮有啲浮腫，笑起上嚟面部有啲鬆弛。網民一直懷疑恭子打botox，話佢雖然32歲，但越係變臉就越顯老化，都係自然啲好喎！
至於由稻森泉同渡邊麻友合演嘅劇集《戰鬥！書店女孩》前日都搞記招，43歲嘅稻森泉平時都keep得唔錯，但由於套劇要等啲書店收舖後，到半夜先至開工拍攝，搞到稻森都老態盡現，面容憔悴，就連麻友都因為要兼顧AKB48工作，每日瞓得一、兩個鐘，都幾陰功豬，好彩佢仲後生，冇乜點走樣。