【第34屆香港電影金像獎之胸有成竹】
第34屆香港電影金像獎頒獎禮將於周日（19日）舉行，王菀之獲提名最佳女配角、最佳新演員及最佳原創電影歌曲，個人獨佔5個提名，是否後無來者未可料，但肯定是前無古人。一個音樂人半途出家投身演員行列，王菀之多得父母在她兒時的親子活動──看電影，潛移默化下集前人大成，學會了作為演員的節奏感，對於獲獎信心，她寧願想大點「我已經寫好感謝辭」。
撰文：何永寧
王菀之（Ivana）憑《金雞SSS》爭金像獎最佳女配角，在最佳新演員一項更有3個提名，包括《金雞SSS》、《Delete愛人》及《分手100次》，另外由她唱的《分手100次》主題曲《不再說分手》亦入選角逐最佳原創電影歌曲獎。Ivana日前接受訪問時提到萬一上台為防掛萬漏一，故事前會準備感謝辭，她說：「份感謝辭唔一定喺台上用，我諗住就算攞唔到獎，都真係有好多人要感謝，所以會放上網。」
最想攞新人獎
Ivana話如果有選擇當然想要全部，但硬要得一項，她希望是新人獎：「睇表面，新人獎機會大啲，因為提名多啲，同埋新人獎人生只可以有一次提名。亦有可能因為提名多分薄票數，但係只要諗到當晚不斷叫我個名（宣佈入圍人名單），已經覺得好威猛，就算攞唔到，都冇辦法。」
Ivana又預計公佈得獎結果前後，電視台分鏡影候選人反應的「那場戲」，會是人生最難演的一場戲，她笑說：「太難演，因為牽強做表情，觀眾都睇得出，所以唔諗，可能到時我會發呆，真係唔知會點。」
出身音樂家庭，但兒時親子活動卻是睇電影，Ivana說：「成家人都好鍾意睇電影，乜嘢電影都睇，特別笑片係首選，可能爹哋、媽咪想有親子活動，事實係大家睇完之後真係好開心。」隨着年紀漸長，看電影的種類亦增多Cult片、驚嚇、人性亦都涉及，Ivana說：「雖然咁鍾意電影，但從來冇幻想過自己會成為演員，始終喺一個音樂家庭長大，演員呢條路感覺好遠。」
睇電影學節奏
Ivana很早就定下要成為音樂人做目標，她首次接觸到演戲，追本尋源要去到商台搞的森美小儀劇場，她說：「嗰次係第一次演出，第一次認識虎度門。到更深入了解演戲，應該喺同風車草劇團合作，小龍導演教咗我好多演戲技巧。」同時她亦歸功於父母當年「栽培」：「睇得喜劇多原來你吸收緊好多唔同喜劇演員嘅節奏，佢哋都有一道板斧㗎。講到喜劇演員節奏，同音樂一樣喺某程度可以學，但某程度係天生嘅。嗰種喜劇節奏大家稱之為off beat，即係好似同人哋拍子唔同咁樣。」
睇電影可以偷師，但Ivana自言商業觸覺欠奉，對市場的喜好一曉不通，更笑言多年前曾被人問了一個很有趣的問題：「卒之明白好多年前有人問我到底啱唔啱做娛樂圈，講性格我真係唔啱，商業觸覺同角度我係零。就算知都做唔到。例如明知條裙襯一對6吋高踭鞋，市場上會覺得靚啲，但係我着都係怪㗎。」
化妝：Janice Tao of ZING The Makeup School
髮型：Zing Wong of Hair Culture
服裝：JUNYA WATANABE of I.T
場地提供：彌敦酒店崇雲廳
