特區因為政改風雲色變之時，作為香港最大政黨嘅民建聯，即將由新女當家引領個黨前進。民建聯今日改選中委後，周五選出新一屆正副主席。雖然話係「選舉」啫，但民建聯一向講求和穩，唔通現任副主席李慧琼要選主席，有人會挑機？花生友都好想知，平時四平八穩無bite用嘅李慧琼，會唔會因應做咗堂主一改風格，言論juicy少少呢？
民建聯52位中委選舉嘅結果今日揭盅；除咗一批舊將，當中有張可能當選嘅新面孔比較多人關注，就係現年28歲嘅觀塘區議員顏汶羽，皆因佢之後有可能接替周浩鼎做青年民建聯主席。呢批中委誕生後，周五就會互選常委，據聞常委數目係由新一屆中委而定，如無意外都會維持番21個。
傳周浩鼎陳克勤做副手
常委誕生後就進入互選正、副主席嘅重頭戲。李慧琼接任主席後，佢會騰空一個副主席職位，連同蔣麗芸話要讓位畀年輕人發揮，即係有兩個副主席位畀新人上，據聞周浩鼎同陳克勤都坐定粒六接棒，會拍住冧莊嘅另外三位副主席陳勇、彭長緯同張國鈞，輔助第一位女當家睇住民記攤檔。
至於退下主席嘅譚耀宗，唔通從此「不在其位、不謀其政」？花生友相信民建聯點會肯畀譚Sir他他條條，既然前主席曾鈺成退任都係會務顧問，相信譚Sir都會獲名譽位，至少暫時輔咗吓新班子。
花生友