香港人往往身在福中不知福，成日話香港不如外國，特別係不如星加坡。左丁山在呢方面就係「本土派」，覺得香港啲基建、公用事業與公共交通不知幾好，直情係領先全球，營運效率第一。傳媒不時大罵地鐵誤時誤點，人多擠迫，講到香港地鐵似乎好不堪，原來本地有不少井底蛙，只睇到一片狹窄天空，不知世界之大。呢呢，前兩個星期，CNN就出咗一篇專訪，驚嘆香港MTR之乾淨企理，營運效率特佳，準時程度遠勝紐約倫敦，車內車外（地鐵站）之治安冇得彈，認為MTR係世界地下鐵路典範，技術與管理可以輸出往澳洲、挪威，揚名世界。香港人經營地下鐵路，由初期計劃興建開始，至今有40年，成就驕人，其實係香港之光，世界上大概只有香港人先至對本地地鐵有咁苛刻評論嘅唧。
仲有一樣，最近地鐵加價，議員照例大罵一通，點知CNN講到香港地鐵車費，竟然話係notoriously cheap！中學時，英文先生教落，用形容詞famous（著名）係講好事，用另一個詞notorious，同樣係指著名，但用於形容壞事，係「臭名昭著」咁解。香港地鐵車費，以世界標準而論，平就係平啦，何解CNN要用notoriously cheap來形容，可能係反諷啩，即係廣東話：「唉，呢間粥舖真係衰，平到冇人有」咁嘅意思，見到褚簡寧，要向佢請教吓。
美國華盛頓特區在四月七日（美國時間）突然停電，令到白宮、國務院開緊新聞發佈會之際，要暫停一陣待後備電力上場，同一時間，馬利蘭州立大學校園亦停電。嘩，美國心臟地段突然停電，直情係國家安全問題，國土安全局話停電不關乎恐怖襲擊，只係營運意外。嗱，呢啲停電法，香港就極為罕有，難怪環境局諮詢意見時，七萬份意見書幾乎同聲反對向中國內地買電，堅持本地兩間公司自行發電，以保供電穩定，令到之前赤膊上陣推銷向內地買電嘅環境局面懵懵，現在環境局又嚟諮詢嘞，目的無非係造勢，要降低兩電嘅利潤准許回報率。在超低息時期，回報率當然可以檢討，但曾俊華司長成日警告美國會加息，美國聯儲局又放晒風話要加息，未來十年八年嘅利率走勢，確係幾難估，於是檢討回報率喎，又會成為一場拔河鬥爭。香港兩間電力公司營運效率又係世界一流，用美國俚語講，if it ain't broken, don't fix it，曾司長係MIT哈佛畢業，唔會唔明白啩？