當大家以為三月尾場西班牙國家打吡後，贏波嘅巴塞隆拿好大機會今季西甲封王，偏偏西維爾做「架樑」，上周六喺一度落後兩球下，靠巴塞後防犯錯，追和呢支一哥2:2，仲搞到對方喺中途爆發將帥不和，今場射入靚罰球嘅尼馬，不滿被教練安歷基換走，喺場邊掟波砵發老脾。不過，講到巴塞失分嘅最大得益者，當然係同日大勝伊巴3:0嘅皇家馬德里，暫時縮窄至兩分落後差距，睇嚟西甲嘅王者爭奪戰，嚟緊一個多月仲有排鬥。
安歷基調走尼馬出事
巴塞呢場波本身形勢大好，早段已靠美斯先開紀錄，踢咗大約半個鐘，尼馬喺禁區頂處理罰球，皮球急勁彎過人牆後入網，將比數擴大到2:0。不過，自舊年三月中起喺比斯桑球場未輸過嘅西維爾，命不該絕，先靠班尼加嘅遠射，令到巴塞門將哥迪奧巴禾出醜拍入網，半場前追成1:2，去到下半場尾段，再藉碧基喺後場傳球失誤，由後備上陣嘅加美路追成2:2完場，令到巴塞燒鬚失兩分。
皇馬輕取伊巴差兩分
講到場波嘅罪人，碧基當然難辭其咎，但我求大俠就覺得教練安歷基都要付上好大責任。佢喺74分鐘突然以沙維入替今場入靚波兼發揮出色嘅尼馬，想搶番多啲控球權，點知弄巧反拙，唔見效果之餘仲要被追和，難怪尼馬被換出時好唔開心，不斷搖頭，坐番後備席嗰陣仲被影到掟砵洩忿。安歷基賽後冇解釋換走尼馬嘅原因，只係承認球隊犯錯，同埋激讚西維爾下半場踢得好。
巴塞失分，擺明益咗皇馬。佢哋同日喺主場半力出擊鬥伊巴，收起加里夫巴利同賓施馬，依然靠賽前上訴成功唔使停賽嘅基斯坦奴朗拿度先靠罰球開紀錄，加上查維亞靴南迪斯同謝斯洛迪古斯各入一球，以3:0大勝，追到只落後巴塞兩分，重燃爭奪西甲冠軍希望。至於周二將同皇馬喺歐聯硬碰嘅馬德里體育會，就因為王子費蘭度托利斯職業生涯首次擺烏龍下，作客只能夠同馬拉加打和2:2。
識睇，一定係睇足英台【英波Live】：
http://soccer.appledaily.com
http://bit.ly/engballlive