新任行會成員兼創新及科技顧問楊偉雄早前被質疑享有台灣居留權，特首辦回覆查詢時卻冇講明有定冇，只稱任命符合《基本法》。唔少傳媒噚日趁楊偉雄出席「青年人與創新科技」論壇，追問呢件事，但楊偉雄只係重申特首辦嘅講法，仲叫記者「呢啲無謂嘢你唔好再搞」。楊偉雄一見記者就已經話唔會接受訪問，追問下先答任命最緊要合情合理合法；有指佢早前已放棄美國國籍，佢話根本唔重要：「我唯一國籍係香港，中國嘅國籍，係咪最緊要呢樣？」
其後佢有啲不耐煩話唔想再解釋，聲言有自由唔答問題，若再逼佢：「如果我離開呢度，主人家唔係好高興。」似乎佢未適應，走得入熱廚房，任何事都要透明。