食物及衞生局局長高永文噚日出席「香港柏金遜症基金」舉辦嘅第13屆「愛心太極操」，同1,700名市民一齊耍太極籌款。事隔一年再做主禮嘉賓嘅高永文，自爆自己之前參加完呢個活動後，雄心壯志要加入「太極軍」行列，仲上網睇晒資料做足準備，但最後又唔記得咗件事，反而太太仲早過佢去學。
仲係太極初哥嘅佢，落場同市民一齊耍楊式太極拳時，都算落足心機，全場係咁望住四周圍偷師，連笑都唔敢笑吓，但係反應就慢過隔籬啲老人家，間唔中起腳快咗，又差啲企唔穩喎。新手上任嘅佢當然都係姐手姐腳，但都總算「模仿」得似模似樣嘅。八方覺得最緊要都係，唔好做官場耍太極高手就得啦。