最近網民瘋傳李錦聯與安德尊「單單打打教煮餸」嘅片段，長和（001）「樓神」趙國雄可能從中取得宣傳靈感，噚日喺售樓處為旗下新盤做宣傳時，自己扮廚神之外，仲搵來一位瑞士籍廚師夾手夾腳煮碟西冷牛扒，兩人當然和和氣氣，亦冇肢體碰撞喇。
趙樓神都有一段時間冇扮鬼扮馬賣樓，忽然扮廚神即刻令人眼前一亮。佢唔係hea扮㗎，身上件廚師制服，上面綉咗樓神嘅英文名Justin Chiu。
不過，跟教煮餸嘅電視節目一樣，趙樓神一句：「由於時間關係，已經準備好晒！」樓神嘅工作主要係切好煮好嘅西冷牛扒、菜，同埋煮番熱個牛肉汁。佢聲稱，自己70年代喺加拿大留學時已經有下廚，最拿手係煮洋蔥煎雞蛋。