笑到最後:一股都冇點算好? - 高明

笑到最後:
一股都冇點算好? - 高明

港股大牛市,好多人發咗,即刻禮拜六日去魚翅撈飯,但係更多「沉默大多數」一股都冇,而家喊緊。本欄粉絲應該知道,高明長假前去旅行,近乎清倉,旅行期間亦都冇打算邊去景點邊查股價,今日都係一股都冇。所以今日呢篇文係畀冇股嘅人睇,上兩星期已經炒得性起的讀者,可以請移玉眼,去睇其他名家精采專欄。

和波當落後 一定亂章

首先,心理上,冇買冇贏,同時都冇輸到,有朋友話要「追番」,我話:追乜?都冇輸過。如果抱住追番心態去炒,即係和波當落後咁打,一定亂章,你又唔係撈基金要追恒指,唔使同指數鬥,放鬆。不過,大家都唔係聖人,賺咗嘅人有意無意講句:「我上個禮拜贏咗幾皮嘢,你冇買咩?哈哈哈」,點都會打擊士氣,所以呢排要同呢類人保持距離。好,咁具體上應該點做好呢?以下提供入市下策同下下策。
下策:先買入升得最少嘅盈富基金(2800),跟大市同步番,按情況再入其他。假期前後升得最勁,係「大陸冇、香港有」嘅股,集中升隻港交所(388),由恒指升穿25000起計,港交所升咗31%,金山軟件(3888)亦升35%,中鐵(390)都升26%。反而,其他一般藍籌只係升約一成,例如中移動(941)、友邦(1299),甚至上一轉行得快嘅平保(2318),都只係升12%,即係同升咗近一成嘅恒指相近。只不過係升一成,而家追,都可以接受,只須要止蝕時狠心一啲,都唔會輸死人。
而且恒指有冷門滙控(005)未升,仲有得博,更何況,叫你買恒指,又唔係叫你買滙控。
下下策:衍生工具槓桿追番。再講一次,大升幾日已過,冇入市,其實你冇輸錢,但心態上要追番的話,只可以用衍生工具,用大槓捍追番。由於有少部份精明投資者已經沽緊貨,呢個時候衝入去已係下策,大槓桿買入更係下下策。
大家可能會問,點解得下策同下下策,我入嚟係睇中策同上策呀。因為,中策係,喺升之前買定,而家繼續坐;上策就係,喺升之前買定,而家逐啲沽貨走。最佳決策時間已經過咗,所以冇可能有中上策,只有下策頂住先,再見步行步。
本欄一向相信,中國有好嘢唔會益你,假設上兩星期係炒憧憬,距離面對現實又近咗(一般相信大陸基金改章程買港股要一個月),但港股大牛市,唔炒始終對唔住自己,所以終極結論係:條路自己揀,仆倒唔好喊。

高明
https://www.facebook.com/bigricetea
本欄逢周一刊出