呢排天氣變幻莫測，噚日突然由雨轉晴，最開心應該係「添馬紅酒佳餚節及數碼生活嘉年華」（圖）展商，因為終於有生意做。展覽上周四開幕，之後一直落雨，搞到中環新海濱變咗爛地，有展商紅酒箱都浸晒，現場拍烏蠅，最後大會退三成租金。
噚日周日天氣好，人流多番啲。展商意酒坊負責人張天保早前大嘆要蝕錢，但佢噚日話生意好番啲。費清本來想問佢可唔可以收復失地，但佢話要忙住做生意遲啲先講（人哋生意好，費清梗係樂意收線啦）。據知主辦單位退埋租後可能要蝕最少100萬。展覽今日就閉幕，朝11開到晚11，展商希望附近寫字樓做嘢嘅人，會趁食晏或者放工去買吓紅酒、食吓嘢。
天要落雨娘要嫁人，冇人可以阻止，但新海濱場地的確有問題，沙塵滾滾，一落雨就變沼澤。早於前年搞美酒佳餚巡禮時已俾人投訴塊地未鋪好晒，但一直未改善，反而節目就一個接一個，除咗摩天輪，臨時活動就有歐陸嘉年華、Cavalia馬戲等，仲邊有時間鋪過塊地吖？
費清聽政界中人講（唔好以為花生友、季陶先識政界人至得㗎），政府有心為佔中洗底，「鼓勵」商界不斷喺中環搞活動沖淡吓；但塊地問題未解決，遲啲雨季仲大鑊，到時弄巧反拙。
費清 ＃要生計，也要生活 ＃毋忘初衷