港台節目《城市論壇》噚日舉行35周年生日Party，請嚟社會上多位左中右重量級嘉賓，去到個個禮拜都開火嘅維園涼亭，齊齊食燒豬賀壽。現場除咗有愛字堆同雙學嘅歷史性握手時刻，亦有「自由抽水」環節，令到現場嘅相對濕度驟然下降。
曾鈺成：遲吓做維園阿伯
主禮嘉賓之一嘅立法會主席曾鈺成一嚟就力數喺節目度學到嘅嘢，包括點喺10秒鐘內做總結、點俾人當面柴台面不改容，仲話遲吓唔做主席，每個禮拜都會嚟做維園阿伯。另一位主禮嘉賓余若薇就攞埋隻碗出嚟做賀禮，拎Tree根「食碗底反碗面」論過橋，話港台公帑嚟自市民，要繼續監察政府。
在場嘉賓又輪流上台賀壽，第一批組合就擦出火花，由「愛字頭」李偲嫣、傅振中同高達斌，迎戰「學界三子」黃之鋒、張秀賢同羅冠聰，仲由主持謝志峰策動咗6人之間嘅「世紀握手」。
第二組上去嘅係泛民同建制議員，點知民主黨劉慧卿一埋支咪，台下觀眾噓聲四起，卿姐忍唔住話：「有冇言論自由㗎？我真係覺得好過份。」
田北辰扮謝志峰教訓觀眾
自由黨周梁淑怡隨即攞咗個耳罩出嚟，話應該戴住嚟行使言論自由。新民黨田北辰亦大騷扮嘢天份，謝志峰上身，教訓現場觀眾。
雖然35歲咁開心，但噚日正式直播嘅時候出現小插曲，論壇第二節完咗去廣告時候，現場電力供應忽然跳掣，轉播訊號一度中斷幾分鐘。連謝志峰講笑咁話，係咪開工前工作人員唔記得拜神。
李八方
mailto:[email protected]