由香港藝術發展局舉辦嘅「香港藝術發展獎」會喺下月底舉行頒獎禮，聽聞林超賢會獲得電影界別嘅「年度藝術家獎」。一向以嚟，呢個頒獎禮嘅所有獎項，都係由各類別嘅評審小組負責評選，佢哋再將建議嘅得獎者名單交畀總評審團通過，不過喺頒獎禮前夕竟然有醜聞爆出。
評審小組成員之一嘅影評人「四維出世」噚日發出嘅公開信指，原本小組經討論後今年呢個獎會係從缺，但總評審團就粗暴更改賽果，夾硬將個獎頒畀林超賢。咁樣無視機制話改就改，搞到評審小組嬲爆要總辭抗議，仲要求林超賢拒絕攞呢個冇程序公義同認受性嘅獎。
秋生：好難有認受性
身為藝發局戲劇組委員嘅黃秋生噚日講起呢件事，佢話：「我雖然係藝發局委員，但呢個獎我冇參與評審，但我覺得如果大會搞到評審小組要總辭，賽果有咁多人議論，大會係有必要向外交代吓成件事，如果唔係佢哋再頒任何獎就好難有認受性。」噚日亦有記者問過林超賢點睇呢件事，但佢就唔評論，亦都冇交代會唔會接受呢個咁具爭議性嘅獎。
撰文：馮仁昭
