一年前的四月我寫過一篇「那年夏天，你錯過了的富貴列車」，唔少人都睇過，叫大家緊記388這架富貴列車，當時140元，一年升了七成；當然，復活節長假回來，上周三成交金額就破2007年高位約2,100億元，創紀錄新高，周四成交更衝至2,900億元，恒指仲差啲升穿埋兩萬八，唔少證券行同銀行系統延誤，打電話落盤又無人聽。
港元需求突然急升
但我可以話你聽這個只是前奏，列車只係從東涌出發去到奧運站，都未過海，不過，過海風高浪急路途難免顛簸，須知道每次狂潮過後，港人荷包都是輕了，要打破魔咒，關鍵是要揀選對象，入得比人早，走得比人更早，走係因為賺够，唔係因為頂唔順大插，但啱啱仲跳緊快舞（金管局多次向市場注資），要開始跳慢舞（A股入MSCI），同埋播埋首《Hey Jude》（人民幣開始國際化），party先會完，咁就到香港站可以落車了。
講番今轉升市，有人話雖然港股通係上星期有兩日用爆額，另外成千幾億係邊度嚟呢？傳聞指內地部份找換店唔夠港元，如果客人真係急住要港紙，可能要比2%以上的溢價，長假前，內地批准公募基金來港的消息已經發酵緊，已部署來港掃貨。
有歐美市場的財經報，嘲笑內地大媽式炒股法來到本港，資金不理公司質素，未來盈利能力係咁掃貨，可是不少他們的基金經理就愁到發慌，因為前排視每段炒AH差價都係放掉H股的機會，現時H股挾晒上去，仲唔追貨，可能半年結時表現大落後，以後都唔使再追。
究竟邊個係儍，可能要睇邊個笑到最後先知。值得留意的係，上星期金管局連續兩日接美元沽港元，維持滙價水平，這是資金四方八面湧入香港的最佳證明，今個星期會陸續有來，今轉每日收市後要留意吓金管局的新聞。
如果此時此刻，手上仍然無貨嘅，可以考慮吓坐番一批，內地行業具代表嘅股份，例如味精業龍頭阜豐（546）、做電腦同智能手機嘅聯想（992），獨特概念嘅中國飛機租賃（1848），以及唯一已上市嘅四大國有資產管理企業中國信達（1359），再加一啲低估值或具折讓嘅半新股份，例如做光纖光纜嘅長飛（6869），同埋較A股有五成折讓嘅廣發証券（1776），最緊要係唔好急，分注吸，建立一定貨底之後，再換入更優質的股份，短線方面，可能大上大落未改，但中線向好係明顯的。
現時想以平價建倉已經可以話係無可能，但係癲價來前，以普通價去建倉仲有值博率，現時股市就似2012年細價樓咁，唔以相對高價上尾班車，等到呢班車開埋先後知後覺，咁無嘢可以再做到。
都係嗰句，癲市之下，冷靜時制定好入市位，出市位先係最重要。講到出入市位，筆者既3月份課程及軟件工作室托賴一位難求，6月只辦一班，希望幫到香港人抓住這一浪，詳情請到張士佳facebook。
張士佳
註：筆者持有中國飛機租賃、中國信達、長飛及廣發証券。