球迷們，認命吧，雖然股市旺過球市多多聲，但呢啲發財機會就係唔屬於你同我嘅，因為以球迷們丁蟹咁嘅品性，玩股票，死硬。
股市金句有云：「唔好將雞蛋放晒喺一個籃入面。」多元化嘅投資組合能有助於分散風險。球迷們呢，只會情迷一隊，唔存在同時支持幾隊嘅空間，當然世上總有少數奇人會專登買愛隊嘅對手贏，萬一愛隊輸波都有啲現金慰藉一下，不過呢種人喺專一球迷眼中，同出軌無異。
股市金句又云：「有些時候會感到自己戰無不勝。不用怕，這些時候不會長久。」
唔係囉，邊隊球迷都好，係會將任何樂觀嘅可能性不斷放大，贏過幾場就唔覺得自己會輸，所以有人話阿仙奴仲可以爭冠，水晶宮仲有機打歐洲賽，李城竟然唔駛降班。
「有錢人等於好人、叻人、有教養的人——這就是香港價值。」基本上攞冠軍越多嘅球隊，就越多人仇視，而憎恨嘅原因有好多，包括金錢太無限、踢得太茅躉、吹雞太偏心等，冠軍就預咗俾人仇視啦，直到另一隊成為第一，阿門。
「股市猶如啤酒，如果沒有泡沫就不是啤酒了。」
咁蹺嘅？球迷們都愛啤啤佢喎，但焦點不在轉眼消逝嘅泡沫，而在於剝到成地都係殼嘅花生。
雖然股壇都有出現過「財經演員」，但好多股評人又確實縱橫廣闊、脈絡無邊，所以渺小嘅股民都寧可信其有。但球迷們呢，波經行家貼士通常係用嚟笑嘅，至於公仔廂嘅講波佬，基本上係畀球迷們用嚟玩捉錯處嘅。
真正專家？球迷們心目中只有一個，就係佢自己。
KEYMAN
節目主持