蔣家旻前年同大佢3年、拍劇撻着嘅朱敏瀚拍拖斷正，但戀情最終見光死，冇幾耐蔣家旻就戀上大佢超過10年嘅港台前DJ、𠵱家喺數碼電台開咪嘅Martin喇！
日前本報先發現蔣家旻一個人喺銅鑼灣行街，行咗一陣佢就行去時代廣場地下連卡佛，原來係同男友Martin會合，最初Martin同幾個講日文嘅朋友一齊，但行行吓就走剩佢哋二個，蔣家旻同Martin之後拍拖行超級市場，但因為假期人多，二人全程只係並肩而行，唔敢有任何親暱動作，直到離開超級市場，蔣家旻喺過馬路時先會輕輕拉住Martin手臂，但一見多人就會縮開手。
蔣家旻和Martin最終喺銅鑼灣玩到夜晚9點多啲，然後就坐小巴去數碼港睇《五個小孩的校長》，其間Martin仲情不自禁錫女友頭頂然後再咀嘴。睇完散場已經11點幾，二人喺夜闌人靜更加完全放下戒心，離開戲院時再咀嘴，然後就手拖手坐的士，齊齊返過千萬嘅碧瑤灣愛巢。