體壇拾趣：
鄧肯封死夏登搞亂西岸

衞冕嘅馬刺上周五發揮王者霸氣，作客火箭靠不老傳奇鄧肯（Tim Duncan）將夏登（James Harden）最後一擊block走，以104:103贏波，48小時內雙殺火箭兼攞到10連勝，仲搞到西岸大亂㖭。

追逐季後賽主場優勢

馬刺鬥火箭除咗係「德州打吡」，雙方仲要為季後賽主場優勢而戰，今場大戰氣氛好濃厚。不過，幾火爆嘅場面都唔會嚇到鄧肯嘅；兩周後將會慶祝39歲大壽嘅佢，攻入全場最高29分兼搶到10個籃板，勁過晒比佢後生嘅球員。鄧肯今場去到關鍵時刻亦再展現「石佛」本色，完場前三秒疑似犯規下block走咗細佢13年嘅夏登球上籃，令馬刺贏一分保住勝局，賽後就壓過晒火箭、拓荒者同快艇，一下子由第六升到上第三（見附表）。
輸波嘅火箭就慘嘞，由第三跌到落第六，隨時連季後賽頭兩圈嘅主場優勢都輸埋。唔少人走出嚟抽水，話鄧肯block走嘅唔只夏登球絕殺，仲有佢個MVP獎，𠵱家只可以爭得分王。不過，一向信心爆棚嘅夏登賽前已經話：「我已經做晒證明自己係MVP嘅嘢，唔使講咁多。」輸一場波，應該唔會搞到輸埋個獎咁兒戲啩。
雖然最尾幾秒唔吹爭議性犯規一向係聯盟潛規則，但最低限度都要統一咁「選擇性執法」，先可以服眾㗎嘛。同馬刺、火箭兩隊爭緊西南分區冠軍嘅灰熊，同日作客爵士就得唔到呢個「不成文優待」，馬克加素（Marc Gasol）喺完場前0.1秒被吹罰，令當時起手射三分嘅哥頓希活（Gordon Hayward）得到三個罰球機會，只係佢射失咗最後嗰球，灰熊先險勝89:88，總算暫時保住個西岸第二。