內地大導演「小白」風流成性，就喺幾個月前同早排合作過嘅一線女星「綠葉」搞埋一齊。兩個人本身都有家室，但朝夕相對，再加上女方主動埋身，結果男方好快就被攻陷！個幾月前，兩個人又試忍唔住喺北京某酒店偷會，雖然佢哋前後腳到，但走嗰時冇避忌一齊去地庫停車場。
業餘龍友四圍伏
雖然唔係坐同一部車走，但綠葉臨走時，情不自禁攬住小白嚟錫，小白當時都好冧，完全唔抗拒咁攬攬女方條腰，親熱一輪兩個先捨得上車走。
話就話當時係三更半夜，但偷食咁張揚好難唔俾人發現同偷拍，事後成功影到相嘅嗰位仁兄仲就主動聯絡咗小白，問佢有冇興趣買番輯相片，小白結果以200萬買咗呢輯相。關仁聽北京一啲行家講，𠵱家多咗一批唔屬於任何傳媒嘅業餘人士得閒會四圍埋伏，就算影到勁爆新聞相都唔係第一時間賣畀傳媒，而係搵番當事人問佢哋要唔要買番，而往往呢啲當事人出價會高過傳媒好多。
撰文：關仁