林建名、趙雅芝及范振鋒前晚現身灣仔君悅，出席仁濟就職晚宴，范日前在寓所樓下與另一名男子涉打架雙雙被捕，前晚夥拍谷爆「湯碗胸」的張秀文做司儀。范的右眼仍有微絲血管爆裂，他表示：「肋骨都可能裂咗，但冇去照過，而且係事發一日之後先至痛。有啲醫生朋友話我𠵱家行得走得都算好彩㗎喇。」
有指涉案男子與他同住一棟大廈，范表示：「其實都希望大家可以冇事，只係一個誤會，大家都無怨無仇，希望以和為貴啦。太太係搵緊樓，家人都擔心，特別係外母大人。有啲男親戚都過嚟住吓，有個男人喺屋企會安心啲，出入亦小心啲，但呢啲嘢都冇得避。」范笑言感謝阿Bob（林盛斌）建議提供新居並免租3個月：「佢同我分析邊區好住啲，地產經紀咁樣。」
採訪：羅慧敏
攝影：陳順禎