【本報訊】一個在戶外舉行、任何人都可以自由進出的節目，注定令主持人心跳加速。由當初無遮無掩「落狗屎」幾乎中止節目、觀眾撐六四屠城險被群毆，到近年嘉賓出走、擲胸圍、玩𠝹刀，驚險場面實在太多。近年《城巿論壇》需加強保安，又要預先查閱示威牌，以防粗口出街，四名主持均感到惋惜和無奈。
「開山祖師」吳明林對當年一次雨中論壇印象最深，那時觀眾席沒有遮蓋，風雨欲來觀眾都不願走，穿着雨衣頂足一小時，「真係傾盆大雨，落狗屎嗰隻，台下有三、四個觀眾繼續坐喺度，台上嘉賓又唔走喎，咪繼續做囉」。
毛孟靜「錫錫」 觀眾收斂
走過大時代的韋基舜，自詡多年來處理意見得宜，遇過最嚴重的衝突是六四那年，「有位女士佢係贊同北京（六四屠城）嘅，當時好多人喊打，最簡單係好安定咁講畀啲人聽，佢有資格發言，你可以唔同意佢，但係做主持要拚死維護佢發言權，啲人知道咁，就唔會再繼續有問題」。
毛孟靜遇過有激動的觀眾高呼「拉司徒華去打靶」，她慶幸女性主持有着數，「我話你咁激動我好難做喎，老老實實，你一陣可唔可以溫柔啲，唔好講粗口先，畀番啲面吖，唔該你吖，錫錫」，結果對方真的聽話收斂。
到千禧年代，謝志峰指現時社會環境令巿民無處發洩，只能以較激烈的方式表達意見，擲胸圍、玩𠝹刀、掟電芯，層出不窮；連嘉賓都失控，2009年嘉賓兼前立法會議員詹培忠不滿發言被打斷，竟在直播中突然離席出走，「仲有拍打長毛啦，長毛又轉身扑番佢啦，呢單仲上緊庭㗎，再者仲有人跳上枱啦，粗口就例湯嚟㗎，梗附送㗎喇」。
■記者張嘉雯