有最美香港小姐之稱嘅李嘉欣，嫁入豪門兼成為馬主，得閒就入場跑吓馬仔，生活優悠。嘉欣BB上季贏過三場頭馬，今季就差啲，只憑「貳寶」季初由雷神操刀，勝出一場一班賽，眨吓眼至今已超過半年，嘉欣同老公亨亨未再拉頭馬。
今期（12日）日賽佢哋玩大堆頭，除咗嘉欣嘅新馬「駟寶」首次登場外，佢老爺許世勳一對愛駒「控惑」及「期惑」亦分途出擊，睇嚟唔係咁啱得咁蹺，而係練馬師告東尼刻意安排，希望增加許氏一族拉頭馬機會。
嘉欣之前一對馬叫「一寶」、「貳寶」，好多人預期佢嘅新馬會叫「三寶」，點知冇「三寶」有「駟寶」。據知嘉欣真係曾入紙，申請愛駒命名為「三寶」，但馬會唔批准，話怕同三寶彩池混淆，於是先有「駟寶」出現。
由於嘉欣嘅名氣，好多人都吼實「駟寶」，但老實講，佢嘅晨課走勢麻麻，八次試閘次次輸好遠吓，既唔覺有上佳狀態，亦冇乜速度爭1000米。反而尾場1600米老爺隻「期惑」，上仗打吡一級賽，抽最劣嘅14檔都追得唔錯，今次降呢爭二班賽，不但對手減弱，負磅更獲下調，改爭外地三捷嘅1600米，嘉欣可能靠「期惑」拉頭馬都未定。