曾經有一段真摯嘅牛市擺喺我眼前，我冇去珍惜，直到股災先嚟後悔莫及，塵世間最痛苦的事莫過於此。如果上天可以畀多次機會，我希望復活節前已買港交所，如果要為呢個牛市加一個期限，我希望係一萬年。
潮流興經濟唔好就印銀紙，但唔係個個國家都有條件印，最起碼嘅條件，就係要該國貨幣作為國際流通貨幣，而且係各國儲備貨幣。美國當然最有條件，現時嘅金融系統，美元係全球硬通貨。中國就唔得，人民幣屬於相對封閉系統，中國如果濫印錢紙，會係津巴布韋下場。所以第一，人民幣要國際化，第二，股市要升。因為銀紙唔可以亂印，股票卻可以印。
印股票好過印銀紙
美國同中國已經鬥到出面，美國經濟復蘇真假難辨，但不斷高唱眾國衰退時自己好轉，全世界都唔好得我好，錢會流向我到；中國則話自己股票牛市重臨，人民幣國際化遍地開花，一帶一路大把油水，唔使走，有錢入嚟齊齊搵。
美國一路拖住唔加息，通脹未達標一類藉口都虛，因為美國核心通脹一直都徘徊1.5至1.7上下，非核心通脹係油價一時三刻拉低，油一升就會急扯。耶倫在加息問題上如唐三藏上身囉囉唆唆，係等緊一個靚位。但可留意一個現象，2015年開始至今，全球金融市場七國咁亂，美國並未真正落手做甚麼，一直都只係靠把口，已經吹起一輪漣漪。即係玩預期。
中國卻調轉。亂局中要保持經濟穩定，你唔信A股牛市就一萬億成交兇到你信，你唔信香港升得穿二萬五就一日升千六點夾到你信，你唔信亞投行搞得成就五百億包底引到你信。因為共產黨係信馬克思，馬克思係唯物觀，而落到中國成為有中國特色嘅唯物觀，就係用結果去說明原因，先做成既定事實，再引導你去認同。即係夾硬嚟。
大國之爭，有兩壇嘢係中國睇在眼內，唔可以重蹈覆轍。一壇係蘇聯因硬通貨流失而衰落，直到今日，俄羅斯都仍然留喺為硬通貨煩惱階段；另一壇係日本因炒爆資產又同時推爆滙水，俾人空手入白刃。呢兩樣會係大思路，喺咁樣嘅情況下，再衍生各種大枝節、中枝節、細枝節去拆，例如人民幣國際化係大枝節、亞投行係中枝節、A股入MSCI同炒起港股係細枝節。
毫無疑問香港喺今次鬥大膽時代中扮演重要角色，呢個角色係一種防火牆加集資池。十年前紅籌湧嚟香港上市，都係用剝離爛賬、靚殼上市嘅方法。今日會有一萬種方法去做，但原理不離其中，所以股市要炒上。其次係6月A股傾MSCI前相信都會頂住，上次MSCI唔肯納入A股係資本賬問題，即係驚有入冇出。滬港通等同開半隻門畀錢進出，如果港股通零成交太難睇，所以6月前都要顯示條喉暢通同無流動性問題。話咩改革紅利會升五年、十年嗰啲都係虛，散戶唯一優勢就係唔對路就閃，如此而已。
Mr. Tregunter