今晚焦點，一定係曼市雙雄交戰（圖），平手盤，曼聯主場只有少少着數咁多，似乎都係買入球「大」穩陣。原本諗住問吓朋友意見，點知個個三句唔埋兩句已經講咗股市，因為仲刺激過睇波賭波。就好似星期四朝早，半個鐘升千四點，嗰種恐怖法，就似上年世界盃巴西幾分鐘內俾德國連入三粒咁震撼，可以話一世難忘。個股市幾乎人人賺錢嘅情況下，將買波嘅資金轉放落股票，博三四線股坐順風車，好過等三四線球隊爆上。不過都係嗰句，股市表面係投資，但呢輪已經賭味甚濃，同時間要睇實兩個account（股票同賭波）嘅讀者，咪亂瞓身，祝你好運。
講開賭波，相信大家都聽過唔少傳言，如：身邊朋友嘅朋友識得馬拉個大莊家、又或者邊個喺國際賭波公司做IT之類，然後就話啲波假到一早編好劇情呀咁。呢啲永遠冇得證實，但可以肯定嘅係，逢係大量金錢迅速轉移嘅地方，都有好多人想控制大局，盡量撈晒投資或投注，冇法，此乃人性。正如《大時代》所言，股票原意，係想集公眾資金發展公司業務，但係人嘅貪婪，將股市變為一個修羅場。如果你識得啲資深球迷，佢哋都會話近十幾年啲波冇咁好睇，又或者越嚟越難捉。有陰謀論者認為係錢作怪，因為連角球、紅黃牌都有得落注嘅時候，幾乎球場每一個動作都同億萬賭注掛勾，故宜小注怡情。
梁栢堅
填詞人+彩池人