星期二在沙田馬場跑馬，主席盃嗰場明知李福鋆醫生隻「步步友」贏梗，賠率熱到一賠一，認真乏味，請客主人家係賓架M，左丁山向佢提出：「按咗我間樓俾你間銀行，攞錢買步步友獨贏，有10%利潤，你制唔制？」賓架M大笑：「你唔記得同德咩？」資深馬迷自然記得，同德大熱門跑第四，釀成悲劇，人所共知，但同德係跑讓磅賽，孭150磅上陣，今天係匪夷所思嘅「虐畜」重磅，而步步友係跑平磅賽，孭126磅，差得太遠嘞，邊度有得輸㗎！
各人明知步步友贏硬，慳番一場唔賭，齋睇跑馬、傾偈。席間有餐飲連鎖店老闆話唔敢再開餐廳，非因租金貴，實在係因為請唔到工人，佢在油尖旺開設嘅餐廳，請洗碗工人，時薪六十元，遠遠高出最低工資，竟然無人見工，最近復活節假期少咗內地遊客來港，好多香港人出外旅遊，市面比較平淡，如果內地遊客數量持續下跌，大家生意少咗，工人荒是否可以紓緩一下？餐飲老闆話講遊客人數下跌，仲係早一啲，要睇耐啲至敢講，但貴重珠寶鐘錶業受埋內地反貪腐影響，當然已經感到寒風陣陣啦。
在座各位都係事業有成之士，不愁衣食，但人人都話為香港下一代擔憂，唔知下一代點樣搵食，賓架M問左丁山點睇，左丁山話：「我為下一場揀馬更擔心！」行出露台睇步步友點贏，見到唐英年與愛女在，唐生現在無官一身輕，生活不知幾自在，是日佢有隻馬出，「回眸一笑」又輸到好遠，此乃等閒事啫，回頭望吓11、12年舊事大可一笑置之，故此呢隻馬嘅英文名字係No Regrets。日前唐生在Facebook擺出一張相片，就係佢與隻馬嘅合照，似有深意，照左丁山意見，多入馬場，少理官場，命都會長啲。
次日早上在中環大馬路竟然碰到多年未見嘅食米L，問佢米舖生意如何，食米L笑曰：「依家講米舖生意，邊度搵到米㗎？」此乃實話，經濟學講食米係inferior good，一個社會人均收入增加時，人均對食米需求就減少，換言之，食米之收入需求彈性低於一，所以在經濟成熟社會賣米，搵唔到大錢。不過食米L又係先天下之憂而憂，對左丁山講：「我好擔心香港下一代點樣搵食。」左丁山對佢講：「我地無可能為下一代計劃晒，留番俾佢地諗，你講多兩句都可能俾年輕人鬧！」