全民股瘋，前港交所主席夏佳理近日又有冇斬獲呢？《壹錘定音》節目噚日訪問阿Ron，佢話：「一日冇沽出，一日都唔算獲利，而我近期冇沽出任何股票。」
原來為免利益衝突，阿Ron過去都冇買入港交所股票，自然冇因港交所暴升而肥到襪都着唔落；但佢喺呢個升市中，都有買入少少港股，透露買入最多嘅係金融股，其次係科技股。浮沉股海多年嘅阿Ron，都有慘痛經驗、交過唔少學費。佢憶述60年代澳洲股市交投活躍，佢投資過幾家能源公司，當時市場時有傳聞，例如邊間公司又搵到石油嘞，而當時廿幾歲嘅佢選擇「博」，最後輸咗大部份身家。反而香港1973年股災，佢就避過一劫，策略包括唔會趁低吸納入市，「因為喺澳洲食過教訓，所以投資策略較保守！」由此證明，學費冇白交。