福建噚晚喺灣仔修頓室內場上演嘅高級組銀牌籃球負方決賽，有主力鄭錦興上半場撼傷頭部送院下，最終以71:93不敵力爭衞冕嘅永倫出局。
永倫同福建噚晚喺近千球迷入場打氣下鬥得激烈，前者憑中鋒賀斯福同前加拿大國手泰那「裏應外合」，首節已大幅領先33:14；屋漏偏逢連夜雨，福建喺第二節初段有前鋒鄭錦興被永倫方誠義封阻後，應聲倒地兼撼到後腦，一度要由隊醫按「人中」保持清醒，好彩佢送去律敦治醫院前已經恢復意識，應該冇大礙。球隊亦未能收復失地，半場落後24:45下，最後以22分之差大敗；永倫今個月27號就會喺新伊館再鬥南華爭冠。女子組均安噚晚就喺頭場以57:52反勝安青，27號同衞冕嘅福建爭奪后座。